Fully vaccinated na si Presidente Rodrigo Duterte matapos mabaton ang ika-duha niya nga COVID-19 shot duha ka bulan matapos siya gintublukan sang una nga dose sang bakuna.
Sa pictures nga ginpakigbahin ni Senator Christopher “Bong” Go, makit-an nga si Department of Health (DOH) Sec. Francisco Duque III sa gihapon ang nag-administer sang ika-duha nga dose ni Duterte.
Ginkumpirma man ni Presidential Spokesman Atty. Harry Roque nga nabaton na ni Pres. Duterte ang second dose sang Sinopharm vaccine.
Nahibaluan nga ang una nga dose sang bakuna ang nabaton sang Presidente sang Mayo 3.
Ang Sinopharm vaccine ang nahatagan sang emergency use authorization sa pungsod masobra isa ka bulan lang ang nagligad.
Base sa World Health Organization, ila ginarekomenda ang interval sang tatlo tubtob apat ka semana sa tunga sang first kag second dose sang Sinopharm vaccine.
