Gindepensahan ni Presidente Rodrigo Duterte si Department of Energy Secretary Alfonso Cusi matapos ginrekomenda sang Senado nga pasakaan ini sang criminal charges bangud sa approval sang sale sang majority stake sa Malampaya gas field.
Una diri, nagpadala ang senado sang resolution sa Office of the Ombudsman nga nagahingyo nga pasakaan si Cusi sang nagakaigo nga criminal kag administrative charges kalakip na ang iban pa nga Department of Energy executives sa anti-graft court kasunod sang Udenna-Chevron deal sa sale sang Malampaya Consortium shares.
Ginpahayag naman ni Senator Sherwin Gatchalian, chairperson sang Senate energy committee nga kasubong nga “lutong makaw,” ang pag-apruba sang gobyerno sa amo nga deal.
Buot silingon, kasubong nga nahisugtan na ini nga daan sa umpisa pa lang.
Apang depensa naman ni Duterte, nagakadapat nga respetuhon sang Senado ang amo nga kasugtanan kag itugyan na sa mga kamot sang business sector ang mga business transactions.
Pahayag sang presidente, indi niya pagpahanugutan nga i-ulamid sang Senado sa katalagman ang valuable resource kasubong sang Malampaya gas field.
Gin-ako ni Duterte nga gina-respeto niya ang gahom sang Senado sa pagpatigayon sang mga imbestigasyon ‘in aid of legislation.’
Apang suno sa iya, nagakadapat likawan sang Senado ang patarasak nga pag-akusar kag sa baylo, tutukan sang maayo ang ‘existing laws’ kag kun paano ini ipatuman.
Sa pihak sini, ginpahayag naman ni Cusi nga nakahanda siya nga atubangon ang mga alegasyon batok sa iya.
