ILOILO CITY – Ginpakamaayo ni Presidente Rodrigo Duterte nga ipa-iway nga istoryahan ang isyu sa ABS-CBN Corporation kadungan sang induction sang mga bag-o nga Board of Trustees sang Kapisanan ng mga Brodkaster ng Pilipinas.
Sa interview sang Bombo Radyo kay Herman Basbaño, bag-o nga chairman sang Kapisanan ng mga Brodkaster ng Pilipinas, iya ginpahayag nga wala sang nangin komento si Duterte sa isyu nga ginapangatubang sang ABS-CBN Corporation apang gin-imbitahan sini ang mga myembro sang Kapisanan ng mga Brodkaster ng Pilipinas nga magpangape agud nga ma istoryahan ang nasambit nga isyu.
Suno kay Basbaño, mas ginhatagan sang atensyon sang Presidente nga ipahanumdom sa mga myembro sang Kapisanan ng mga Brodkaster ng Pilipinas nga ipalayag ang tanan nga nagakalatabo ilabi na sa gobyerno apisar nga siya ang maguba man.
Lakip man sa na istoryahan sa induction sang mga bag-o nga Board of Trustees sang Kapisanan ng mga Brodkaster ng Pilipinas amo ang isyu sang korapsyon sa pungsod sa diin naghingyo ang Presidente sang bulig sa media nga iwaragwag kun sin-o man ang naangot sa korapsyon agud ini ang matapna.
Sa pihak nga bahin, ginpahayag ni Basbaño nga dako ang nangin katungdanan sang radyo sa mga sosyudad kadungan sang pagselebrar sang World Radio Day.
Ginakalipay niya nga ang radyo ang nagakabuhi sa gihapon sa Pilipinas.
Suno kay Basbaño, importante nga ginasuportahan sang mga tawo ang radyo nga ginakuhaan sang “real-time information”.
Masaligan man ang radyo pahayag niya kun ipaanggid sa mga impormasyon kag balita nga nagaguwa sa social media.
