Wala na naman nakaluwas si Senator Richard Gordon sa mga makahang nga tinaga ni Presidente Rodrio Dutrerte kadungan sang Talk to the Nation kagab-i.
Sa sulod sang isa ka oras kag 45 minutos nga speech sang presidente kaupod ang mga cabinet members, kapin 50 minutos man nga gin-atake ni Presidente Duterte si Senator Gordon sa mga preska sini nga tirada.
Ginmanduan sang presidente ang Department of Health (DOH) nga imbestigahan ang ginaalegar “false positives” sa mga COVID-19 tests nga gina-conduct sang Philippine Red Cross.
Suno sa presidente, nakabaton siya sang reports sang false positive results halin sa mga swab test samples nga ginaproseso sang Red Cross.
Pahayag pa ni Duterte, kun luyag ni Senator Gordon sang transparency, mas maayo man nga usisaon sang administrasyon kun bala may yara sang transparency ang organisasyon nga ginapamunuan sang senador.
Matandaan nga gina-imbestigahan sang Research Institute for Tropical Medicine ang insidente sa Subic sa diin pila ka mga hospital personnel ang nagpositibo sa virus apang sang gin-retest tatlo ka adlaw matapos ang una nga test, nagnegatibo sila sa COVID-19.
Sa initial reports, 49 ka mga health personnel ang nagpositibo sa virus sang Septyembre 3 base sa test nga gin-conduct sa laboratory sang Red Cross suno kay Deputy Speaker kag SAGIP party-list Representative Rodante Marcoleta.
Apang matapos ang second test sa lain nga laboratory, 44 sa ila ang nagnegatibo sa COVID-19.
