ILOILO CITY- Nagpasalig sang bulig si Presidente Rodrigo Duterte sa pamilya sang ginluthang-patay nga negosyante nga si Delfin Britanico sa Nabitasan, Lapaz, Iloilo City sang Enero 19.
Sa interview sang Bombo Radyo kay anay Banat partylist representative Buddy Britanico,amay sang biktima, iya ginpahayag nga personal siya nga nagpadulong sa Malacañang agud makigkita kay Presidente Duterte agud maghingyo sang bulig nga mahatagan sang hustisya ang kamatayon sang iya anak.
Suno sa anay assemblyman,magluwas sa Presidente, nakig-istorya man ini kay National Bureau of Investigation director Dante Gierran nga natabuan man nga yara sa palasyo sang amo nga tion.
Ginpahayag ni Britanico nga gilayon nga ginmando ni Presidente Duterte sa National Bureau of Investigation Central Office nga amo ang lead agency nga magauyat sa kaso ni Britanico.
Suno kay Britanico, may mga katapo na sang National Bureau of Investigation Central Office nga nag-abot na sa syudad sang Iloilo para sa imbestigasyon.
Suno pa sa iya,ang imbestigasyon ang mangin isa ka inter-agency cooperation upod man sa Philippine National Police.
Dugang pa niya, maid-id nga pag-uyat sa kaso ang ginmando ni presidente Duterte sa nasambit nga mga ahensya agud madakpan ang utok sa kamatayon ni Britanico.
