ILOILO CITY- Nagapakuno-kuno lang si Presidente Rodrigo Duterte nga wala ini nahadlok nga mapreso matapos nakit-an sang International Criminal Court prosecutor nga may “reasonable basis” sa crimes against humanity nga nakumiter sa war on drugs sang administrasyon.
Ini ang reaksyon ni Senator Antonio Trillanes IV matapos ginpahayag ni Presidente Duterte nga kun ‘destiny’ niya ang mapreso, handa man ini.
Sa interview sang Bombo Radyo kay Senator Antonio Trillanes IV, iya ginpahayag nga triggered kag ginakulbaan na si Presidente Duterte bangud kaangay nga nagahugas-kamot na ini kag nagapalusot sa mga pagpamatay sa pungsod.
Suno kay Trillanes, nagapamroblema na subong ang Presidente bangud sa tion nga umpisahan na sang International Criminal Court ang preliminary investigation sa masunod nga tuig, wala na sang lusot ang presidente.
Pahayag pa sang senador,kun matapos ang termino ni Duterte sa 2022, pat-ud nga matapos naman ang masadya niya nga mga inadlaw.
Nahibaluan nga ginalauman nga magapagwa saang desisyon ang opisina ni ICC Prosecutor Fatou Bensouda sa first half sang 2021 kun dayunon sini ang pormal nga imbestigasyon sa ginaalegar extrajudicial killings sa pungsod.
