Nagtanyag sang padya balor P1 million si Presidente Rodrigo Duterte agud madakop ang mga tawo nga yara sa likod sang pagluthang patay sa apat ka mga pulis sa Ayungon, Negros Oriental.
Ang mga pulis amo sanday Cpl. Relebert Beronio, Pat. Raffy Callo, Pat. Roel Cabellon kag Pat. Marquino de Leon lunsay mga PNP intelligence personnel nga nakabase sa 704th Mobile Force Company Regional Mobile Force Battalion sang PNP Central Visayas.
Ginbisita ni Duterte ang hamyang sang mga pulis kag nagpalab-ot sang pagpakig-unong sa mga pamilya.
Siguraduhon sang Presidente nga mahatagan sang hustisya ang pagkapatay sang mga pulis.
Kadungan sini, ginmanduan ni PNP Chief Gen. Oscar Albayalde ang pagpangita sa mga myembro sang New People’s Army nga gina-akusaran responsable sa pagpatay sa apat ka mga pulis.
Suno kay Albayalde, gina-usisa na sang mga otoridad ang tanan nga lugar sa pungsod agud madakop ang mga suspek.
Nahibaluan nga gin-ambush ang mga pulis sang Hulyo 18 samtang padulong ang ini sa ila detachment sa Sitio Nabinca sa diin magluwas sa pagluthang patay, ginhigot pa ang ila mga kamot sa likod nga bahin kag may mga patimaan pa sang pag-torture kag paglampos sang matig-a nga butang sa nawong rason nga na-deformed ini kag ginapahayag nga ginkawat pa ang ila mga importante nga pagkabutang lakip na ang liyabe sang tatlo ka mga motorsiklo kag mga armas sang mga pulis.
