Madamo sang mga utok kag pwersa sa likod sang nagatuhaw nga mga isyu tuhoy sa pag-agaway sang China kag Pilipinas sang teritoryo sa West Philippine Sea.
Sa interview sang Bombo Radyo sa political analyst nga si Ramon Casiple, executive director sang Institute for Political and Electoral Reform (IPER), iya ginpahayag nga madamo sang mga kritiko sang Duterte administration ang nagasakay sa isyu kaangay na lang sang mga myembro sang oposisyon kag sang mga may interes sa nasambit nga isyu.
Suno kay Casiple, si Presidente Rodrigo Duterte, ang wala sang plano nga mag-away sa teritoryo sang Pilipinas nga gina-agaw sang China bangud mas ginapasulabi sini ang pag-abyanay sang duha ka pungsod.
Ini ang rason suno sa natungdan nga wala ginpakigbato sang Duterte administration ang nangin desisyon sang the Hague sa diin napamatud-an nga ang West Philippine Sea ang ginapanag iyahan sang Pilipinas kag indi sang China.
Nahibaluan nga wala ginakilala sang China ang kinamatarong sang Pilipinas sa gina-agawan nga isla.
