𝗠𝗔𝗡𝗜𝗟𝗔 — Hatagan pa ni President Ferdinand “Bongbong” Marcos Jr. sang mas malawig nga oras ang kaugalingon agud nga makapili sang magabulos kay Vice President Sara Duterte bilang tiglikom sang Department of Education (DepEd).
Ini kasunod man sang pag-resign ni Duterte bilang Secretary sang DEPED.
Suno kay Marcos, indi mahapon ang magpili sang bag-o nga ibulos sa amo nga posisyon ilabi na nga ginapadalman niya ang screening process agud nga nagakabagay sa pwesto ang mabutang sini.
Ginpahayag man sini nga isa sa ila ginalantaw amo ang kun ano gid ang kinahanglan sang DepEd, ilabi na nga madamo ang nagasuhestyon nga nagakabagay ibutang bilang secretary amo ang isa ka manunudlo, sa diin, ginakabig man sini nga isa ka valid nga concern.
Nakita man sang presidente sa pagsekyar sang mga curricula vitae nga pila sa mga potential candidates ang may maayo nga performance.
Gin-athag man sini nga ang nagakabagay sa pwesto amo ang may pag-intindi bilang isa ka manunudlo nga may yara sang leadership traits.
Ginalantaw man sini ang ikasarang sang isa ka Secretary nga malab-ot ang tinutuyo, handom, kag plano sang gobyerno agud nga maangkon ang masanyog nga educational standard.
Ginhatagan man ni Marcos sang empasiya nga ang masunod nga tiglikom sang DepEd ang dapat nakahibalo kun paano magmanihar sang budget agud nga makabulig sa mga manunudlo kag estudyante.
Nahibaluan nga anay na nga ginkadismaya ni Vice Pres. Duterte ang manubo nga performance sang mga Filipino nga estudyante sa 2022 Programme for International Student Assessment (PISA) kag nagsiling nga kinahanglan sang collective effort agud nga maresolba ang problema.
Nagaguwa sa PISA report nga ang mga Filipino students ang nagpangaduha sa pinakailihi nga listahan sa patag sang creative thinking.
Nagpasalamat naman si Marcos sa nangin kontribusyon ni Duterte sa DepEd bangud para sa iya, indi mahapos ang mangin tiglikom sang amo nga departamento.
