Nag-abot na si President Ferdinand Marcos, Jr. sa Malaysia sang Domingo agud magtambong sa 46th ASEAN Summit.
Naghugpa ang eroplano nga ginasakyan sang Presidente kag iban pa nga mga delegasyon sa Bunga Raya VIP Complex sang Kuala Lumpur International Airport alas 5:41 sang kahapon sang hapon.
Samtang nga wala sa pungsod ang Presidente, temporaryo naman nga mangin caretaker sang Gobyerno sanday Executive Secretary Lucas Bersamin, Justice Secretary Jesus Crispin “Boying” Remulla, kag Agrarian Reform Secretary Conrado Estrella III.
Upod ni Marcos sa iya biyahe amo sanday First Lady Louise “Liza” Araneta-Marcos, Presidential Communications Secretary Jay Ruiz, Trade and Industry Secretary Christina Aldeguer-Roque, kag Mindanao Development Authority head Tereso Magno.
Sa nasumbit nga summit, ginalauman nga ipanindugan ni Marcos ang soberanya sang Pilipinas sa tunga sang padayon nga geopolitical tensions, kinahanglanon para sa responsable kag etikal nga paggamit sang artificial intelligence, kag ang posisyon sang pungsod kaangot sa US tariffs.
Suno sa Department of Foreign Affairs (DFA), ginapaabot nga may 22 ka dokumento ang paggwaon halin sa summit, upod na ang Kuala Lumpur Declaration on ASEAN Vision 2045, kag mga joint statements halin sa 2nd ASEAN-Gulf Cooperation Council (GCC) kag sa ASEAN-GCC-China Summits.
Magahiwat man si Marcos sang pila ka bilateral meetings kag magatambong sa siyam ka leaders’ engagements, lakip na ang sesyon upod ang ASEAN Business Advisory Council, mga kabataan nga representante, kag mga parliamentarians.
Magapartisipar man siya sa 16th Brunei Darussalam-Indonesia-Malaysia-Philippines East ASEAN Growth Area (BIMP-EAGA) Summit nga siya mismo magapanguna, 2nd ASEAN-GCC Summit, kag sa ASEAN-GCC-China Summit.
Sa pihak nga bahin, ginpasiguro ni President Marcos nga ipanindugan kag e-promote sang Pilipinas ang interest sini sa palaabuton nga ASEAN Summit 2025 nga pagahiwaton sa Kuala Lumpur, Malaysia.
Suno sa Presidente, kabahin sa mga isyu nga pagatukibon amo ang tensyon sa West Philippine Sea, sitwasyon sa Myanmar, kag iban pa nga may kahilabtanan sa seguridad kag kaayuhan sang rehiyon.
