Ginmando ni President Ferdinand “Bongbong” Marcos Jr. ang temporaryo nga suspensyon sang tanan nga importasyon sang humay sa sulod sang 60 ka adlaw umpisa Setyembre 1, 2025.
Suno kay Acting Secretary Dave Gomez sang Presidential Communications Office, kabahin ini sang tikang sang Malacañang agud maprotektahan ang lokal nga mga mangunguma nga ginapalibutan subong sang kabudlayan bangud sa barato nga presyo sang palay sa tunga sang harvest season.
Ginklaro sang Department of Agriculture nga ang ginapatuman nga ban para lamang sa well-milled kag regular milled nga klase sang humay.
Ang mga malahalon kag imported nga klase sang bugas kaangay sang basmati kag fragrant rice, indi apektado sang suspensyon.
Ginpatuman sang Presidente ang nasambit nga direktiba matapos siya mag-konsulta sa mga miyembro sang Kabinete sa iya lima ka adlaw nga state visit sa India.
Ini man ang ginrekomendar ni Agriculture Secretary Francisco Tiu Laurel Jr.
Antes pa sini, ginrekomendar na sang DA nga pasangkaron ang taripa sa imported nga humay bangud sa mabaskug nga pagbuhin sang presyo sang palay sa piyak sang kasubong nga pinakamataas nga produksyon nga na-record.
