Gin-anunsyo ni US Secretary of State Marco Rubio nga magahiwat sang una nga bilateral nga meeting sanday Philippine President Ferdinand Marcos Jr. kag US President Donald Trump sa Washington.
Pahayag ni Rubio nga ginahulat nila ang pag-abot ni Marcos sa Amerika bilang kabahin sang isa ka official working visit.
Ini nga pagbisita ang una sa isa ka lider sang Association of Southeast Asian Nations (ASEAN) nga gin-imbitar mismo ni Trump sa White House.
Suno kay Philippine Ambassador to the US Jose Manuel Romualdez, wala pa sang pat-ud nga petsa sang pagbisita, apang ginalauman nga matigayon ini sa Hulyo 21 ukon 22.
Samtang, magapadala man ang Pilipinas sang trade delegation sa masunod nga semana sa US agud ipadayon ang negosasyon matapos ginpataasan sang administrasyon ni Trump ang taripa sa mga produkto halin Pilipinas sa 20%.
Ginkumpirmar man si Palace Press Officer Undersecretary Claire Castro ang pagbisita, apang naglikaw siya nga maghatag sang dugang nga detalye, kun sa diin ang Department of Foreign Affairs ang nagakadapat nga magpaathag tuhoy diri.
Ang lihok nga ini ginakabig nga isa ka importante nga diplomatic engagement sa tunga sang duha ka pungsod, kag kabahin sang mas lapad nga estratehiya sang Estados Unidos kag Pilipinas sa pagpabakod sang ila alyansa sa tunga sang nagapadayon nga tensyon sa West Philippine Sea.
