Ginkumpirmar sang Philippine Center for Investigative Journalism nga ang anay UniTeam tandem nanday President Ferdinand Marcos Jr. kag Vice President Sara Duterte nakabaton sang minilyon nga donasyon halin sa mga contractor sang nagpadalagan sila sa 2022 national elections.
Sa amo nga report, nakabaton si Marcos sang kabug-usan nga P21 million nga donasyon halin sa Rudhil Construction & Enterprises Inc. Quirante Construction Corporation nga ginapag-iyahan nanday Rodulfo Hilot Jr. kag Jonathan Quirante.
Nahibaluan nga ginbayaran man sang Esdevco Realty Corporation ni Glenn Escandor ang mga political advertisements ni Duterte nga nagabalor sang P19.9 million.
Ginpahayag pa nga ang mga kompaniya nga ini ang may aktibo nga kontrata sa gobyerno antes ukon samtang nagapadayon ang eleksyon.
Luwas kanday Marcos kag Duterte, nakabaton man sang donasyon si Senador Chiz Escudero halin sa tatlo ka mga contractor, nga naglab-ot sa kabug-usan nga P70 million.
Lakip man sa nakabaton nga mga Senador amo sanday Senador Joel Villanueva nga nakabaton sang P20 million, Senador Win Gatchalian nga nakakuha sang donasyon nga P9.5 million.
Samtang, si Senador Loren Legarda nakabaton sang P100 million nga donasyon gikan sa kompaniya sang anak sini nga si Congressman Leandro Legarda-Leviste.
Na-record man nga si Senador Robin Padilla nakabaton sang P1 million nga balor sang cellphone halin sa contractor sang DepEd, kag airtime nga P8.75 million halin kay Agriculture Secretary Francisco Tiu Laurel Jr.
Si Senador Miguel Zubiri naman ang gin-report nga nakabaton sang P20 million nga donasyon halin kay Laurel.
Matandaan nga base sa 1985 Omnibus Election Code, ginadumilian ang pagbaton sang mga kandidato sang donasyon halin sa mga kontratista ukon kumpaniya nga may kontrata sa gobyerno.
Ini bangud possible nga magresulta sa conflict of interest kag undue influence sa mga desisyon sang mga opisyal sa ti-on sang ila panunugyan.
