Magabisita si Presidente Ferdinand Marcos Jr. sa “ground zero” kun sa diin nag-igo ang magnitude 6.9 nga linog sa Cebu.
Suno kay Presidential Communications Office Chief Dave Gomez, nauna na ang pila ka mga cabinet secretaries nagpadulong sa lugar agud maghatag sang nagakaigo nga bulig sa mga naapektuhan.
Dugang pa ni Gomez nga ginakasubo sang presidente ang natabo nga insidente kag nagpalab-ot man ini sang simpatiya sa mga biktima.
Ginpasiguro man sang presidente nga magabulig ang national government sa local government units nga apektado sang linog.
Gilayon man nga ginmanduan sang Presidente ang mga lideres sang frontline government agencies nga gilayon nga buligan ang mga apektado sang linog.
Nahibaluan nga nagsaka na sa 69 ang numero sang mga napatay sa nasambit nga linog.
Sa amo nga numero, 30 ang na-record sa Bogo, 22 sa San Remigio, 10 sa Medellin, kag isa sa Sogod, isa man sa Tabuelan, kag lima sa Tabogon.
Suno sa Department of Social Welfare and Development (DSWD), ginabulubanta 27 ka pamilya ang apektado sang linog sa Northern Cebu.
Samtang, nagdangat naman sa P2 billion ang infrastructure damage nga ginbilin sang nasambit nga linog.
