Magabyahe padulong Amerika si President Ferdinand Marcos Jr. sa Domingo, Hulyo 20, agud pagatun-an ang mga isyu nga may kaangtanan sa Pilipinas kag iduso ang interes sang mga Pilipino.
Suno kay Foreign Affairs Assistant Secretary Raquel Solano, una sa agenda ni Pres. Marcos sa iya pagpakigsapol kay U.S. President Donald Trump amo ang pag-istoryahanay angot sa 20% nga reciprocal tariff nga ginpatuman sang Amerika sa mga produkto sang Pilipinas.
Ginpahayag ni Solano nga may mga opisyal na sang gobyerno sang Pilipinas ang yara na sa Washington D.C. subong, kag nagapadayon ang negosasyon bahin sa nasambit nga isyu.
Ginalauman sang pamunuan nga pinaagi sa sining pagbisita ni Pres. Marcos, mahimo nga makalab-ot ang isa ka bilateral trade agreement ukon kasugtanan sa reciprocal trade nga pareho magabenepisyo ang duha ka pungsod.
Sa bahin naman sang seguridad kag depensa, ginpaathag ni Solano nga posible man maestoryahan sang duha ka lider ang mga developments sa West Philippine Sea.
Ginalauman man nga pinaagi sa sining pagbisita, makakuha liwat ang Pilipinas sang dugang nga suporta halin sa Amerika para sa pagpakusog sang kapasidad kag kagamitan sang Armed Forces of the Philippines (AFP) kag Philippine Coast Guard (PCG).
Magapadayon ang opisyal nga pagbisita ni Pres. Marcos Jr. sa Estados Unidos tubtob Hulyo 22, bilang sabat sa imbitasyon ni President Donald Trump.
