ILOILO CITY – Nagmandu si President Ferdinand Marcos Jr. sa tanan nga government agencies nga padasigon ang pagpagwa sang joint memorandum circular nga nagapahanugot sa pag-release sang pondo nga kinahanglan para sa fuel subsidy.
Ini ang sabat ni Budget Secretary Amenah Pangandaman sang ginpamangkot kun nakahatag na sang mandu ang presidente nga padasigon ang pagpagwa sang circular ilabi na nga nagsulod na sa ikapito nga sunud-sunod nga semana ang pagsaka sang presyo sang gatong.
Suno kay Pangandaman, sang naghinun-anon ini kay Transportation Secretary Jaime Bautista sang nagligad nga semana, ginhambalan niya ini nga kinahanglan na nga matapos ang joint memorandum circular.
Una na nga ginpa-athag sang Department of Budget and Management nga makapagwa lamang sila sang ₱3-billion subsidy para sa public utility vehicle operators kag drivers sa tion nga may yara na sang circular nga nakabutang ang guidelines nga pirmahan sang Department of Transportation kag sang Department of Energy.
Suno sa Department of Transportation, masobra 1.6 million nga mga drivers kag operators ang makabaton sang fuel subsidies nagikan sa gobyerno kadungan sang nagasaka nga presyo sang gatong.
