𝗖𝗘𝗕𝗨 𝗖𝗜𝗧𝗬 —Nagtambong si Presidente Ferdinand Marcos Jr. sa pagbukas sang Palarong Pambansa 2024 sa Cebu City Sports Center.
Apang, ang pila sa mga core officials sa likod sang kahiwatan, partikular si Bise Presidente Sara Duterte kag ang ginsuspende nga Cebu City Mayor Michael Rama, ang wala nagtambong.
Gin-abi-abi naman si Marcos nanday Cebu Governor Gwendolyn Garcia, kag acting city officials nga sanday Raymond Alvin Garcia (Mayor) kag Dondon Hontiveros (Vice-Mayor).
Samtang, si Senator Imee Marcos ang nagbisita man sa Cebu City Sports Center antes pa man nag-abot si Pres. Marcos.
Sa speech ni Marcos, gindayaw sini ang mga organizers sa pagpakilala sang bag-o nga mga bahin sa Palaro kaangay sang dance sports category nga iya ginlaragway nga isa ka nagakabagay nga paghatag sang pasidungog sa host nga Cebu City.
Para sa presidente, ang Queen City of the South ang nakaangkon sang reputasyon bangud sa nagauswag nga dance sports scene, sa Pilipinas kag sa luwas sang pungsod.
Ginpahanumdom man sang Presidente sa mga atleta kag mga coaches gikan sa 17 ka mga rehiyon nga dapat hatagan sang importansya ang paghiliusa kag pag-abyanay sa bug-os nga semana nga paindis-indis.
Sa pihak sang ‘no show’ sa pagbukas sang Palarong Pambansa, ginpaambit naman sang Bise-Presidente ang mga litrato sang iya pagbisita kag paghalad sang pangamuyo sa Basilica Minore Del Sto. Niño de Cebu pila ka oras antes ang pag-abot ni Marcos.
Nahibaluan nga bilang anay Education Secretary, si Vice Pres. Duterte ang aktibo nga naga-intra sa paghanda sang Palaro sa pungsodnon nga lebel.
Kaangay ni VP Duterte, ang suspendido nga alkalde nga si Rama ang ginhatagan man sang daku nga kredito sa pagbalik sang Palarong Pambansa sa Cebu City matapos ang 30 ka tuig.
