ILOILO CITY – Ginbasol ni Presidente Rodrigo Duterte ang mga industrialized countries sa nagakatabo nga climate change nga nagaresulta sa kapyerdehan sang pungsod bangud sang polusyon nga ila nga ginatuga.
Suno kay Duterte, ang mga pungsod nga may madamo nga pabrika ang dapat nga basulon sa polusyon nga nagatuga sang climate change.
Wala ginpangalan sang presidente ang ini nga mga pungsod nga contributor sang carbon emissions sa kalibutan.
Ginpahayag man sini nga ang Pilipinas ang labing apektado sang climate change apisar nga ang pungsod ang naga-contribute man sa polusyon apang mas magamay nga contributor kun ikumpara sa iban nga pungsod.
Dugang pa sang presidente nga “unfair” para sa pungsod nga magbayad sang sala sang mga industrialized countries.
Pahayag dugang sang presidente nga dapat ang mga industrialized countries amo ang mabayad sa pungsod sa damage nga gintuga sang mga ini.
Nahibaluan nga sang damlag lang, ang Pilipinas ang gin-igo sang bagyo Agaton kun sa diin, masobra sa isa ka gatos ang nagkalamatay.
