ILOILO CITY – Nakasugtan ni Presidente Rodrigo Duterte kag Chinese President Xi Jinping nga himuon ang tanan agud nga mapabilin ang kalinong sa West Philippine Sea.
Nagpatigayon sang telephone summit ang duha ka presidente pila ka semana pagkatapos nga gin-report sang Philippine Coast Guard ang nangin encounter sa isa ka Chinese vessel malapit sa Panatag Shoal.
Magluwas sina, sang nagligad nga bulan, isa man ka Chinese Navy vessel ang nakita sang otoridad sa Sulu.
Sa ginpaggwa nga statement sang Malacañang, sa pihak sang territory dispute, magapabilin ang maayo nga relasyon sang duha ka pungsod.
Suno sa palasyo, gin-review ni Duterte kag ni Xi ang relasyon sang China kag Pilipinas sa sulod sang anum ka tuig kag ginlaragway ang direksyon sang ila relasyon nga positibo kag gintuga para mapasangkad pa ang partnership kag kooperasyon.
Naintindihan sang duha ka presidente nga ang kooperasyon para sa ekonomiya kag imprastuktura sa tunga sang duha ka pungsod ang ginpabaskog pa kag gin highlight ang significant growth sang bilateral trade kag economic exchange.
Ang telephone summit ang naglawig sang duha ka oras nga gintambungan ni Climate Change Commission vice chairman Secretary Robert Borje, Acting Foreign Affairs Secretary Ma. Theresa Lazaro, kag Deputy Assistant Secretary Myca Fishcher.
Dugang pa sang Malacañang, ang duha ka lider ang pag-elevate sang Philippines-China bilateral relations sa comprehensive strategic cooperation bilang isa ka dako nga kadalag-an.
