Natalana nga magpagwa sang pinal nga desisyon subong nga adlaw si Presidente Rodrigo Duterte may kaangtanan sa pagpatuman sang Enhanced Community Quarantine sa Metro Manila kag iban pa nga Coronavirus Disease high-risk areas.
Magluwas sa Metro Manila ang iban pa nga mga lugar nga nakapaidalom sa Enhanced Community Quarantine tubtob sa biyernes ang ginalakipan sang Central Luzon magluwas sa Aurora Province, Calabarzon (Cavite, Laguna, Batangas, Rizal, Quezon), Pangasinan, Benguet, Albay, Iloilo lakip na ang Iloilo City, Cebu lakip man ang Cebu City, Bacolod City, Zamboanga City kag Davao City.
Suno kay Presidential Spokesman Harry Roque, lauman nga magapagwa na sang pinal nga desisyon si Presidente Duterte subong nga adlaw may kaangtanan sa matabo sa Mayo 16 pagkatapos sang pagpatuman sang Enhanced Community Quarantine.
Natalana man nga magsapol ang mga katapo sang Inter-Agency Task Force on Emerging Infectious Diseases subong nga aga agud istoryahan ang pinal nga rekomendasyon kay Presidente Rodrigo Duterte may kaangtanan sa kun ano ang matabo sa mga lugar nga nakapaidalom sa gihapon sa Enhanced Community Quarantine.
