ILOILO CITY – Nagpaandam si Presidente Rodrigo Duterte sa mga kandidato nga ang masobra duha ka bodyguards ang mahimo na nga makonsiderar nga private army.
Sa Talk to the People, ginpaandaman ni Duterte ang mga pulitiko nga magsunod sa election laws kag ginpasigurado nga wala siya sang may ginadampigan.
Suno sa presidente, kun may yara sang ginasuspetsahan nga piligro ang mga kandidato sa ila nga tinawo ukon sa ila nga lugar, dapat nga i-report sa kapulisan ilabi na sa regional director kag istoryahan agud nga malikawan na ang away kag paggamit sang armas.
Nagpaandam man ini nga siya mismo ang madakop sa pulitiko nga magtuga sang gamo subong nga election.
Una na nga ginpahayag ni Commission on Elections (COMELEC) chairman Saidamen Pangarungan nga indi sakop sang gun ban ang Office of the Vice President, mga senador, congessmen, court justices, Cabinet secretaries kag mangin sa assistant secretaries lakip na ang ila nga security detail.
Ang mga agent sang National Bureau of Investigation (NBI) kag election officers ang ginhatagan man sang pareho nga prilibihiyo.
