ILOILO CITY- Nagpadulong sa Leyte si Presidente Rodrigo Duterte kadungan sang pagdumdom sang Byernes Santo.
Ang Leyte ang tuman nga naapektuhan sang bagyo Agaton.
Kabahin sang aktibidad sang presidente amo ang aerial inspection sa Baybay City nga gin-agyan sang landslide bangud sang mabaskog nga ulan.
Ginpamunuan man sang presidente ang situation briefing upod sang mga opisyal kag ahensya sang gobyerno agud nga i-assess ang mga napatay bangud sang bagyo.
Sa data sang National Disaster Risk Reduction and Management Council (NDRRMC), nagdangat na sa 137 ang nagkalamatay, 28 ang padayon nga ginapangita kag walo ang napilasan.
Dugang pa sang ahensya, ang kumpirmado gid lamang amo nga pito ang gin-report nga napatay, anum ang napilasan kag isa ang missing.
Nagdangat sa 1,689,436 nga indibidwal ukon 494,607 ka pamilya ang naapektuhan sang bagyo sa 2,068 ka mga barangay sa Bicol, Western Visayas, Central Visayas, Eastern Visayas, Northern Mindanao, Davao, Soccsksargen, Caraga, kag Bangsamoro suno sa NDRRMC.
