Ginpaathag sang F. Gurrea Constructions ang rason sa likod sang pagka-delay sang ila flood control project sa Brgy. San Isidro, Jaro, Iloilo City, matapos ini personal nga ginbistahan ni Presidente Ferdinand “Bongbong” Marcos Jr.
Sa interview sang Bombo Radyo kay Raymund Tabuga, Assistant to the President sang F. Gurrea Constructions, ginpahayag niya nga ang problema nga pirme nagaapekto sa proyekto amo ang presensya sang mga informal settlers sa kilid sang suba.
Suno sa iya, amo ini ang nagapadugay sang implementasyon kag ginakabig nga daku nga dilemma sa ila bahin.
Ginpabutyag man ni Tabuga nga nakabulig gid ang proyekto sa pagmitigar sang pagbaha sa lugar, kag maayo gid nga nakita sang Presidente ang aktuwal nga sitwasyon.
Dugang pa niya, ara gid ang proyekto, intact kag may klaro nga budget nga ginaproponer para sa padayon nga implementasyon.
Ginatinguhaan sang kompaniya nga matapos ang proyekto sa husto nga oras agud maprotektahan ang komunidad batuk sa baha.
