Sa labing una nga kahigayunan, nakit-an ang presensya sang ousted civilian leader sang Myanmar nga si Aung San Suu Kyi matapos ini nagtambong sa court hearing.
Ini ang first appearance sang lider humalin sang kudeta nga natabo sa pungsod sang Pebrero 1.
Nagpatigayon sang face-to-face meeting si Suu Kyi kaupod ang iya nga legal team sa sulod sang 30 minutos.
Suno sa abogado sini nga si Khin Maung Zaw, gindiskusyonan ang mga kaso nga ginapangatubang sang ousted leader kag kun ano bala ang mga pamaagi nga mangin hilway ini sa pagkapreso.
Sa pihak sini, nagalaom si Suu Kyi nga kuntani yara lang sa maayo nga kahimtangan ang ikaayong lawas sang mga tawo sa Myanmar.
Antes pa man sang hearing, ginapahanugutan lang ang lider nga makig-istorya sa iya mga abogado pinaagi sa video sa diin yara sa gihapon ang presensya sang security personnel nga nagabantay sa iya.
Nahibaluan nga si Suu Kyi ang nagapangatubang sang sampaw-sampaw nga kaso humalin sa ginaalegar iligal nga pagbakal sini sang walkie-talkie radios tubtob sa paglapas sa official secrets act — ang kaso nga may pagkapreso nga nagalab-ot tubtob sa 14 ka tuig.
Ang ousted civilian leader sa idalom sang National League for Democracy (NLD) party ang nagdaog sang November 2020 elections.
Apang para sa militar, ang pagdaog ni Suu Kyi ang ginpaagi sa pagdinayaay rason nga ginkuhaan nila ini sang gahom kag nagdeklara sang kudeta.
