Apisar sang masako nga schedule, nasal-ot na gid man nanday President Ferdinand Marcos Jr.kag First Lady Liza Marcos ang ila date paagi sa paglantaw sang concert sang legendary American singer-songwriter nga si James Taylor sa Pasay City.
Base sa Facebook post sang First Lady nga may caption, “An evening with James Taylor”, natabo ang date sang nagligad nga Lunes, Abril 8, sa Mall of Asia.
Kun matandaan, ginsiling ni President Marcos sang Lunes nga nalaktawan na nila nga mag-asawa ang ila duha ka dates kag magabawi siya bangud nagasunggod na ang First Lady.
Ang 76-anyos nga Ameringan singer nga ila ginlantaw ang nagpahalipay sa mga Pinoy sang ginkanta sini ang iya hit songs nga “How Sweet It Is,” “You’ve Got a Friend,” “Smiling Face,” “Shower The People” kag “Fire and Rain.”
Nahibaluan nga may concert man kuntani ini sa Pilipinas sang 2017 apang wala nadayon bilang kabahin sang iya protesta sa drug war killings sa idalom sang Duterte administration.
Sang Enero, matandaan nga naglantaw man ang mag-asawa nga Marcos sa concert sang British band nga Coldplay sa Philippine Arena sa Bulacan kag nakabaton pa sang kritisismo bangud sa paggamit sang presidential chopper apisar nga malapit man lang ang venue sa Malacañang.
Kahapon sang hapon sang nagbiya si President Marcos sa Pilipinas agud magtambong sa trilateral meeting sa Washington kaupod kay US President Joe Biden kag Japanese Prime Minister Fumio Kishida.#
