US – Nagpabutyag si US President Donald Trump nga wala siya sang plano nga ipauntat ang iya mga campaign rallies sa pihak sang pagtaas sang kaso sang Coronavirus Disease 2019 sa Estados Unidos.
Suno kay Trump, magapadayon ang ginapatigayon niya nga ‘Keep America Great’ campaign events sa pihak sang pagpamahog sang virus.
Samtang wala naman nagakabalaka si Trump nga may yara na sang narekord nga kaso sang COVID-19 sa Washington DC nga pila lang ka milya ang kalayuon sa White House.
Una naman nga ginpahayag ni Trump nga wala sang nagakadapat nga ikabalaka apisar nga nagpanugyan na ang Centers for Disease Control and Prevention nga likawan anay ang pagkadto sa pampubliko nga lugar.
Padayon naman nga nakabaton si Trump sang kritisismo bangud sa wala niya pagsunod sa panugyan sang mga eksperto sa ila mga pahayag may kaangtanan sa coronavirus.
Nahibaluan nga sa pinaka ulihi nga data, naglab-ot na sa masorba 400 ang kaso sang COVID-19 sa Estados Unidos, lakip na ang 19 nga kumpirmado nga patay sa diin kalabanan ang nagikan sa estado sang Washington.
