ILOILO CITY – Hilway nga makapadulong sa Estados Unidos si President-elect Ferdinand “Bongbong” Marcos Jr. sa tion nga makapungko na bilang presidente.
Suno kay US Deputy Secretary of State Wendy Sherman, ang mga lider sang pungsod ang may yara sang diplomatic immunity.
Ang pagdaog ni Marcos Jr. bilang presidente ang nagapahanugot sa iya nga magpadulong sa Estados Unidos kag indi pag-arestuhon sa iya nga $353-million ukon P18.7B contempt order batuk sa iya pamilya may kaangtanan sa human rights class case.
Apang, ginklaro ni Sherman nga si Marcos Jr. gid lamang ang may yara sang diplomatic immunity kag indi ang bilog nga pamilya sang anay diktador nga si Ferdinand Marcos Sr.
Nahibaluan nga si Marcos Jr. kag si Sherman ang nagsapol kahapon kag nagsugtanay sa importansya sang pag-updanay sang duha ka pungsod agud nga mapabaskog ang ekonomiya lakip na ang public-private partnerships, clean energy kag digital economy.
Una na nga nagpabutyag sang pagpanginbulahan si US President Biden kay Marcos Jr. kasunod sang kadalag-an sini sa May 9 elections.
