ILOILO CITY – Gindeklarar ni President Ferdinand “Bongbong” Marcos Jr. ang Disyembre 26 bilang special non-working day agud nga mahatagan ang mga Pilipino sang full opportunity agud nga magselebrar sang paskwa upod sa ila pinalangga sa kabuhi.
Sa Proclamation No. 425, ginpahayag ni Marcos nga ang Disyembre 25 nga amo ang Christmas Day ang natu-on sa Lunes.
Suno kay Marcos, ang mas malawig nga weekend ang maga-enganyo sa mga pamilya nga mag-ululupod kag pabaskugon pa ang ila nga relasyon nga magaresulta sa mas maayo nga sosyodad.
Dugang pa niya, ang mas malawig nga weekend ang maka-promote man sang domestic tourism.
Ginmanduan man sang presidente ang Department of Labor and Employment nga magpagwa sang nagakaangay nga circular agud nga mapatuman ang ini nga proclamation sa mga the private sector.
Sang 2022, gindeklarar man ni Marcos ang Disyembre 26 bilang special non-working day sang natuon sa Domingo nga adlaw ang Christmas Day.
