ILOILO CITY – Ginmandu na ni President Ferdinand “Bongbong” Marcos Jr. sa Philippine Sports Commission nga maghatag sang bulig sa Philippine sports legend nga si Lydia de Vega nga nagapakigbato subong sa Stage 4 breast cancer.
Ini ang ginkumpirma ni PSC executive secretary kag officer-in-charge Atty. Guillermo Iroy Jr.
Suno pa kay Iroy, ginkasubo sang presidente ang nadangatan ni de Vega.
Nahibaluan nga nagapangayo sang bulig ang pamilya ni de Vega bangud nga yara na sa tuman ka critical nga kondisyon ang Philippine Track and Field legend bangud sang kumplikasyon nga dala sang breast cancer.
Si de Vega ang ginakabig nga Asia’s fastest woman, two-time gold medalist sa Asian Games kag bemedaled athlete sa nagkalain-lain nga edition sang Southeast Asian Games nga iya ginpasakupan.
Siya man ang isa sa mga flag bearers sang SEA Games Federation flag upod ang iban pa nga Filipino sports legends sa ginpatigayon nga 2019 edition sang biennial meet nga ginhiwat sa pungsod.
