Kuntento si President Ferdinand Marcos Jr. sa resulta sang 2025 midterm elections apisar nga anum lang sang mga kandidato sa iya administrasyon ang nagdaog sa pagka-senador.
Suno kay Palace Press Officer Claire Castro, tama ka kuntento ang Presidente bangud nakita niya nga ang iban nga mga nagdaog ang may kaugalingon nga dignidad kag prinsipyo, kag kadam-an sa ila ang nagaserbisyo para gid sa pungsod.
Base sa partial unofficial results sang 2025 midterm elections, upod sa top 12 nga nagdaog sa Senado amo sanday Erwin Tulfo, Ping Lacson, Tito Sotto, Pia Cayetano, Camille Villar, kag Lito Lapid.
Apang ginpahibalo sang Malacañang nga indi sila magpasugot sa mga “obstructionist” nga mga lawmakers nga ang ginatuyo amo lang ang kaugalingon nga interest.
Ginalauman man sang administrasyon ang presensya sang lehitimo nga oppositionists, apang batuan ang mga obstructionists nga nagatago sa ngalan sang oposisyon kun sa diin posible nga kaugaligon lamang nila ang ila nga ipakigbato.
Ginklaro man ni Castro nga lain ang “obstructionist” sa mga lehitimo nga oposisyonista.
Gin-athag man niya nga ang lehitimo nga oposisyon ang nagaduso man sa interes sang pungsod samtang ang obstructionist ang nagapangguba lang kag wala sang positibo nga ginahambal ukon ginasuportahan.
Ginpahayag man sang Malacañang nga ginahingyo sang administrasyon ang tanan nga bag-o nga napilian nga opisyal nga bisan ano pa man ang ila Partido, kinahanglan nga nga magbuligay para sa kaayuhan sang pungsod.
Dugang pa ni Castro, ini ang desisyon sang mga pumuluyo, kag dapat lang respetuhon kun sa diin ang tanan nga proyekto ukon programa nga may kaayuhan para sa pungsod, dapat suportahan.
