𝗠𝗔𝗡𝗜𝗟𝗔 — Nagpaguwa si President Ferdinand Marcos Jr. sang executive order (EO) nga tuyo bag-uhon ang import duty rates sang mga produkto agud nga pahagan-haganon ang ‘inflationary pressure’ kag protektahan ang ‘purchasing power’ sang mga Filipino.
Sa idalum sang Executive Order No. 62, ang pila ka mga produkto kaangay na lamang sang animal products, tanom, pharmaceutical needs, chemicals kag iban pa ang kinahanglan nga i-subject sa Most Favored Nation (MFN) rates, kaangay na lamang sa ginpromisa sang iban nga pungsod nga ipatuman ang imports halin sa myembro sang World Trade Organization (WTO).
Tuyo sang amo nga executive order nga ipatuman ang multi-year kag komprehensibo nga schedule sa taripa nga magahatag sang transparent kag predictable nga tariff structure, nga nagapahanugot naman sa mga negosyo nga maka-engage sa medium- to long-term planning agud ma-improve ang productivity kag competitiveness, maka-facilitate sang trade, kag mapasanyog ang consumer welfare.
Mantandaan nga una na nga gin-aprubahan sang National Economic and Development Authority (NEDA) Board ang Comprehensive Tariff Program 2024-2028 nga may tinutuyo nga mapanubo ang presyo sang bugas kag iban pa nga nagapanguna nga balaklon.
Sa idalum sang amo nga programa, magapabilin ang subong nga taripa masobra tunga sang mga produkto nga agricultural kag industrial.
Ginalauman naman nga ini na ang pinakadako nga mabuhin sa presyo sang bugas bangud halin 35%, panubuon ang taripa sa 15% nga may tuyo nga mapamag-an ang galastuhan sang mga Pilipino ilabi na nga dako ang nangin kontribusyon sang bugas sa inflation rate.
