Ginpahayag sang Malacañang nga bukas si President Ferdinand Marcos Jr. sa pagbaton sang maayo nga mga suhestyon halin sa pamilya Duterte may kaangtanan sa mga proyekto kag isyu sang flood control sa pungsod.
Suno kay Press Officer Undersecretary Claire Castro, padayon ang paghimakas sang Pangulo sa pagresolba sang mga problema nga naangut sa flood control. Ginpunto niya nga indi makabulig sa pumuluyo ang mga komentaryo lang nga wala sang klaro nga solusyon.
Ginsiling pa ni Castro nga mas maayo kun makabulig ang pamilya Duterte sa publiko sa kabug-osan nga 13,917 nga flood control projects sang nagligad nga administrasyon kag sa muni nga tikang, mahibaluan sang katawhan kun ini nga mga proyekto epektibo, nagagana, kag maka resolba sa baha.
Gindugang pa ni Castro nga bukas si President Marcos sa tanan nga rekomendasyon basta ini may pulos kag makahatag sang benepisyo sa pumuluyo.
Ang pahayag sang Malacañang naguwa matapos ginpahayag ni Davao City Vice Mayor Sebastian Duterte ang iya kabalaka sa mga proyekto nga ginatawag niya nga “ghost flood control.” Ginpabutyag man niya nga may ara sila sang flood control master plan upod ang Japan International Cooperation Agency.
Sa subong, yara si Sebastian Duterte sa Netherlands kaupod ang tatlo niya ka utod agud bisitahon ang ila amay nga si Rodrigo Duterte, nga yara sa International Criminal Court bangud sang alegasyon nga ‘extrajudicial killings’ sa ‘war on drugs’.
