Nagpasalig si President Ferdinand R. Marcos Jr. nga iya ihatag ang bug-os nga suporta sa mga atleta nga Pilipino matapos pormal nga ginbuksan ang ika-65 nga Palarong Pambansa sa Ferdinand E. Marcos Sr. Memorial Stadium sa Laoag City, Ilocos Norte.
Suno kay Marcos, tubtob sa ila masarangan, ginahimo nila ang tanan agud nga mangin maayo nga humalampang ang mga pamatan-on.
Dugang pa sang presidente nga, magdaug man ukon mapierde, makabig sila nga kampeon bangud sa ila sportsmanship kag dedikasyon sa pagdaug sa kompetisyon.
Samtang, nagpanugyan naman si Marcos sa mga atleta nga halungan ang ila ikaayong lawas kag padayunon ang ila mga handom tubtub nga malab-ot ang kadalag-an.
Ginpahayag man sini nga sa palaabuton, ang iban sa ila ang makarepresentar sang pungsod sa international competitions.
Ang Palarong Pambansa sa sini nga tuig magapakita sang 24 ka regular nga hampang, lakip ang athletics, basketball, volleyball, gymnastics, taekwondo, kag swimming.
Ginabanta 15,000 ka mga delegado gikan sa 20 ka mga athletic associations, lakip ang 18 ka mga rehiyon sang pungsod, ang National Academy of Sports, kag ang Philippine Overseas Schools, ang magapakigbahin sa Mayo 25 tubtob 30.
