Nakabalik na diri sa Pilipinas si President Ferdinand “Bongbong” Marcos, Jr. kasunod sang tatlo ka adlaw nga official visit sa Estados Unidos sang Amerika nga nagalakip sang meeting kay US President Donald Trump.
Sa iya arrival statement, nagpasalamat ang presidente sa US government kag sa mga pumuluyo sini sa pag-abi-abi sa iya kag sa delegasyon sang Pilipinas.
Ginpatpat man sini ang nangin aktibidad niya sa luwas sang pungsod lakip na ang na-istoryahan sa nagapanguna nga mga isyu kaangay sang seguridad, negosyo, kag defense cooperation.
Ginsugid sini nga nagpromisa ang US government sang dugang nga bulig para sa Luzon Economic Corridor initiative kag iban pa nga foreign assisted projects. Dugang sini, nakipagkita siya sa business leaders kag top executives sang nagkalain-lain nga mga kumpaniya kun sa diin nakakuha siya sang masobra $21 billion sa investment pledges.
“We return to the Philippines with over $21 billion in investment pledges that have the potential to create thousands of direct and indirect jobs for Filipinos within our country,” pahayag sini.
Dugang pa sang chief executive, gin-imbitar sini si Trump nga magbisita sa Pilipinas para sa Association of Southeast Asian Nations (ASEAN) meetings sa 2026 sa idalom mismo sang chairmanship sang Philippine government.
“I look forward to hosting President Trump next year to attend the ASEAN meetings under the Philippines chair, which also coincides with the commemoration of the 80th anniversary of the Philippines, US diplomatic relations and 75 years of the Mutual Defense Treaty,” dugang sa iya nga arrival statement.
Antes ang pahayag ni Marcos, nauna na nga ginkumpirma ni Trump nga ginbuhinan niya sang 1% ang kuntani 20% nga taripa sa Philippine exports.
Ginpasalamatan man ni Marcos ang paninguha sang Estados Unidos nga masuportahan ang mga Pilipino nga apektado sang habagat. Pahayag sini, magapadayon ang gobyerno sa paghatag sang bulig sa mga nagakinahanglan.
“Sa gitna ng kalamidad, inuuna ng inyong pamahalaan ang kaligtasan, kalusugan at kapakanan ng bawat Pilipino. Patuloy ang ating pagtugon sa epekto ng malakas na pag-ulan at pagbaha dulot ng habagat sa iba’t-ibang panig ng bansa. Ang ating mga ahensya, katuwang ang mga lokal na pamahalaan ay walang patid sa pagsasagawa ng mga rescue and relief operations upang masigurong agad na makarating ang tulong sa mga pamilyang apektado,” pahayag sang presidente.
Nagpangabay man ang punong ehekutibo sa mga pumuluyo sa ginabaha nga mga lugar nga magpamati gid sa abiso sang gobyerno kag magkooperar sa awtoridad.
“Hinihikayat ko ang lahat na makipagtulungan sa mga otoridad, sundin ang mga babala ng panahon at agad na lumikas kung kinakailangan. Sa ating pagkakaisa at pagtutulungan, malalampasan natin ang pagsubok na ito,” dugang sini.#
