Nagpasaka sang kaso nga Syndicated Estafa ang anom ka mga principals kag school heads sa Duenas, Iloilo, batok sa presidente sang St. Robert’s International College kag sa iban nga mga indibidwal.
Ang mga respondents amo sanday Dr. Robert Galindez, President sang St. Robert’s International College nga nahamtang sa E. Lopez Street, Jaro, Iloilo City.; Merry Plaza Alon; Dr. Tomas M. Panceles; Cesar Equibal Eglarinda III, Louise Bruza Mercader; Dr. Ma. Angie Padernilla, anay Dueñas DepEd District Supervisor; kag iban pa nga mga ginatudlo kahimbon sa ginaalegar pagpadalagan sang isa ka ‘diploma mill’ o pagtanyag sang peke nga graduate program.
Ang mga tagreklamo naman amo sanday Joenele Soqueño, Vivien Lavadia, Sharon Langreo, Rowena Ortizo, Mercy Lagulay, kag Mary June Pacino nga lunsay mga residente sang Dueñas.
Sa interview sang Bombo Radyo kay Atty. Kaiser Cordero, legal counsel sang mga complainants, iya ginpahayag nga base sa joint judicial complaint-affidavit sang mga tagreklamo, gin-engganyo sila sang mga respondents sang 2025 nga magtuon sa idalum sang International Oriental Medical Doctors College – Northwest Samar State University Special Academic Program (IOMDC-NwSSU-SAP) sang St. Robert’s International College kag St. Robert’s Training and Management Center (SRTMC).
Base pa sa pahayag sang mga tagreklamo, ginpasalig sila sang mga suspetsado nga otorisado sang Northwest Samar State University ang amo nga programa.
Suno sa ila, mismo si Merry Plaza Alon ang nagpasiguro nga may iban pa nga DepEd personnel nga nag-enrol man sa programa.
Ginpasalig man ang mga ini nga accelerated ang graduate program kag sa sulod lang sang pata ka bulan, matapos na nila ang degree.
Naengganyo pa gid ang mga ini bangud ang venue sang ila graduation amo ang pungsod Thailand nga gintalana kuntani sang Disyembre 2025.
Nagbayad ang mga tagreklamo sang kapin P560,000 para enrollment fees, tuition fees, kag iban pa nga mga balayran.
Apang, tuman ka dako ang ila pagkadismaya nga ulihi na nila natukiban nga indi otorisado ang programa kag wala man sang accreditation ang mga respondents nga magtanyag sang NwSSU graduate programs.
Nahibaluan nga ang Syndicated Estafa isa ka non-bailable offense ukon kaso nga wala sang piyansa.
