ILOILO CITY- Pangunahan ni Presidente Ferdinand Marcos, Jr. ang inagurasyon sang Jalaur River Multipurpose Project Phase 2 sa palaabuton nga Hulyo 16,2024.
Sa interview sang Bombo Radyo kay anay Senate President Franklin Drilon, iya ginpahayag nga ginakalipay niya nga ginbaton sang Presidente ang imbitasyon sang National Irrigation Administration para magtambong sa kahiwatan.
Suno kay Drilon, dako ang papel sang Marcos administration sa paghuman sang nasambit nga proyekto bangud nadugangan ang pondo para diri kag ginpaiway ang pulitika para sa kaayuhan sang mga pumuluyo sa Iloilo.
Pahayag sang Ilonggo nga former senator nga ang P19.7-billion infrastructure development project ang magapataas sang rice production kag makahatag benepisyo sa 25,000 ka mga mangunguma kag 4,500 ka mga myembro sang indigenous communities sa probinsya.
Dugang pa ni Drilon, ini nga proyekto nga mangin fully operational sa tunga-tunga sang 2025 ang magahatag sang tubig sa 23 ka mga banwa kag duha ka syudad sa Iloilo, kag maga- irrigate sa 9,500 ka ektarya sang rainfed nga mga umahan magluwas pa sa nagaeksister nga 22,340 ektaryas gani mapataas gid ang ani sang humay sang tubtob sa 71 percent ukon 338,000 metric tons.
Nahibaluan nga magluwas sa paghatag sang water supply, amg proyekto may yara man sang 6.6-megaWatt power generation, bulk water, fishery, tourism, flood control, housing para sa mga indigenous people, kag carbon sequestration components.
Ginapabugal naman ni Drilon nga ang Jalaur River Multipurpose Project Phase 2 amo ang pinakadako nga water impoundment project sa gwa sang Luzon.
