Nagpabutyag sang pagkadismaya si Presidente Rodrigo Duterte sa pag-delay sang negosasyon para sa Code of Conduct (COC) sa South China Sea.
Santu sa ginpaguwa ng statement ni Presidential Spokesman Atty. Salvador Panelo, ginpaathag ni Duterte sa 34th Association of Southeast Asian Nations summit sa Bangkok, Thailand nga may posibilidad nga madamo pa nga maritime incidents ang matabo kun nagadelay lamang ang pagpatuman sang COC.
Ginpahayag man sang Presidente nga wala siya sang may ginakulbaan nga pungsod.
Bangud sini, padayunon sang Pilipinas nga iduso ang pagpatuman sang 2002 Declaration on the Conduct of Parties sa South China Sea bilang coordinator sang ASEAN-China Dialogue Relations kaupod ang iban nga mga ASEAN member-states.
Ginpakigbahin man sang Presidente sa summit ang natabo sa 22 ka mga manugpangisda nga Filipino sa Reed Bank.
Naghatag man sang kahigayunan si Duterte nga pasalamatan si Vietnamese Prime Minister Nguyen Xuan Phuc amo man ang kapitan kag mga crew sang Vietnamese fishing vessel nga nagsalbar sa mga Filipino samtang nagalutaw-lutaw sa baybayon.
Ginpaboran naman sang mga ASEAN leaders ang pagpatuman sang matawhay kag hilway nga pagresolba sa nangin diskusyon sa summit may kaangtanan sa South China Sea santu man sa international law, lakip na ang 1982 UNCLOS (United Nations Convention on the Law of the Sea).
Gina-umpisahan naman sang ASEAN ang pagpakig-istorya sa China agud nga panugyanan nga likawan ang paggamit sang armas ukon pagpakig-away sa iban nga pungsod agud man malikawan ang giyera.
