ILOILO CITY – Simple lamang ang pagpangabuhi ni Presidential candidate Ferdinand “Bongbong” Marcos, Jr. kag ang isyu sa ill-gotten wealth sang iya pamilya ang wala napamatud-an.
Ini ang pahayag ni Presidente Rodrigo Duterte pagkatapos nga gintawag niya ‘weak leader’ ang anak sang anay diktador.
Suno sa presidente, nadumduman niya nga nagasakay gid lamang si Marcos sa iya sang nagliligad nga mga kampanya ilabi na sang siya ang senador pa.
Gindepensahan man niya ang anay senador nga indi pa ini masaligan nga mabilinan sang binilyon nga kwarta bangud bata pa ini sang nangin presidente ang iya amay.
Apang, si Bongbong Marcos ang sadto 29 anyos na sang ginsipa sa pwesto ang iya diktador nga amay.
Ang pahayag sang presidente ang tuman ka layo sa ginbuy-an niya sang Nobyembre sang gintawag niya nga ‘spoiled’ kag ‘weak leader’ si Marcos kag wala ini sang bilib sa iya.
Baliskad sa ginpahayag ni Duterte, na-recover sang Presidential Commission on Good Government (PCGG) ang masobra P170 billion sa ginabanta $10 billion ukon ₱524,794,990,000.00 nga ill-gotten wealth sang pamilya Marcos.
Ang ini nga isyu ang padayon nga gin-deny sang pamilya.
Sa gindeklarar naman nga Statement of Assets, Liabilities, and Net Worth (SALN) ni Marcos sang 2015, nagdangat sa P211 million ang iya nga net worth.
Ang iya nga asset ang ginalakipan sang madamo nga mga propedad sa Laguna, Benguet, Ilocos Norte, Taguig City kag Mandaluyong City nga nagabalor sang masobra sa P66.6 million.
Ang condo unit naman sa Makati City nga ginlista niya nga “investments” sa idalom sang iya “personal properties” ang nagabalor sang P78 million –P11 million nga masobra sa balor sang ginlista niya nga real properties.
Sa pihak sini, ginpanindugan ni Presidente Rodrigo Duterte nga wala ini sang iga-endorso nga bisan sin-o nga presidential candidate sa local and national elections sa Lunes, Mayo 9.
Ini ang ginpahayag sang presidente sa miting de avance sang Hugpong ng Pagbabago (HNP) sa San Pedro Square malapit sa Sanguniang Panglungsod sang Davao.
Nahibaluan nga ang iya anak nga si vice-presidential bet kag Davao City Mayor Sara Duterte-Carpio amo ang running mate ni presidential candidate Ferdinand “Bongbong” Marcos Jr.
Nagtambong si Duterte sa nasambit nga rally bangud sang imbitasyon sang iya anak nga si Davao City mayoral candidate Sebastian “Baste” Duterte.
Antes ang pag-abot sang presidente sa venue, personal nga naghatag sang mensahe si Sara sa crowd bilang pagsuporta kay Marcos.
Wala si Sara sa stage sang nag-abot ang iya nga amay.
Diri man kag liwat nga ginlaslasan sang presidente ang re-electionist nga si Sen. Richard Gordon.
