Gintawag nga ‘buang’ ni Presidente Rodrigo Duterte si Senior Associate Justice Antonio Carpio matapos ginpahayag sang mahistrado nga unconstitutional ang pagpahanugot sang gobyerno sa Chinese fishermen nga makasulod sa exclusive economic zone (EEZ) sang Pilipinas.
Suno kay Duterte, istupido nga sahi sang tawo si Justice Carpio kag wala siya nagabilib sa mahistrado apisar nga nagikan ini sa Davao.
Una na nga ginpahayag ni Carpio nga ang paggamit sang marine sources sa EEZ ang eklusibo lamang para sa mga Pilipino.
Bangud sa nangin pahayag sang Presidente kay Carpio, mas ginpili sang mahistrado nga indi na maghatag sang komento.
Dugang pa sang Presidente, nagapangita lamang ang iya mga kritiko sang gamo pinaagi sa pagdumili sa China nga makasulod sa EEZ.
Gin-athag pa ni Duterte nga wala sang sovereignty ukon gahom ang Pilipinas nga dumilian ang mga Chinese nationals sa EEZ sang Pilipinas.
Nahibaluan nga ginpahanugutan sang Presidente ang mga Chinese activities sa EEZ bangud sa pag-abyanay sang Pilipinas kag China.
