ILOILO CITY – Ginpahayag ni Presidente Rodrigo Duterte nga posible, may yara siya sang maayo nga hinimuan nga nagbilin sang maayo nga impression sa Ginuo nga nagbulig sa iya sa iya pagpungko bilang presidente sa sulod sang anum ka tuig.
Ini ang pahayag ni Duterte kadungan sang groundbreaking ceremony sang Philippine Sports Training Center (PSTC) sa Bagac, Bataan sa nabilin nga duha ka semana sa pwesto.
Suno sa iya, indi na siya makalakat sang maayo bangud sang fracture nga nakuha sa pagsakay sa motorsiklo.
Dugang pa niya, nakahibalo gid ang Diyos kag ginhatag sa iya pagkapresidente apisar nga tigulang na siya.
Sang nagligad nga tuig, nagguluwa na ang iya mga masakit apang timing lang bangud manug tapos na ang iya termino.
Nahibaluan nga sa nagliligad niya nga mga speeches, ginbuyayaw niya ang Ginuo kag gintawag nga stupid.
Ginpahayag man ni Duterte nga bilang isa ka presidente, nangin faithful siya sa iya trabaho kag ang iya nga sweldo ang tuman lang para sa iya duha ka pamilya.
Suno sa iya, nagdangat sa P196,000 ang iya nga sweldo kag bangud duha ang iya pamilya, wala na siya sang bisyo kag wala nagainom.
Ginsulit man niya ang iya nangin statement sang nagligad nga ginpangaluyagan niya ang mga komunista agud nga makakuha sang boto apang bangud sang iya responsibilidad bilang presidente, ginpasangkad niya ang anti-insurgency efforts.
Sa maabot nga Hunyo 30, ginpahayag ni Duterte nga indi na siya isa ka shining star kundi isa na gid lamang ka ordinaryo nga pumuluyo sang pungsod.
