ILOILO CITY–Ginalauman nga maga-abot buwas sa hapon si Presidente Rodrigo Duterte sa syudad sang Iloilo agud nga pangunahan ang ika-25 nga National Motorcycle Convention.
Ginapahayag nga alas 6:30 buwas sa kasisidmon maga-abot si Duterte sa Iloilo Convention Center (ICC) agud nga magserbe nga dinapit nga bisita sa nasambit nga kahiwatan nga iga-host sang Iloilo Motorcycle Club (IMC).
Lakip sa mangin katapo sang receiving party amo sanday Sec. Michael Lloyd Dino sang Office of the Presidential Assistant for the Visayas, Iloilo governor Arthur Defensor Sr., Iloilo City Mayor Jose Espinosa III kag Dr. Ruben Ramirez, presidente sang Iloilo Motorcycle Club.
Ginabantayan naman sang tanan ang mangin kaundan sang mensahe ni Presidente Duterte sa patigayunon nga programa buwas sa gab-i.
Una na nga ginpahayag ni Mr. Victor Facultad, Vice President sang Iloilo Motorcycles Club, nga ginabanta nga magalab-ot sa 3,000 tubtub 4,000 ka mga big bike enthusiast ang magatambong sa kahiwatan.
May yara man sang patigayunon nga display sang nagkalain-lain nga model sang big bikes.
Ang duha ka adlaw nga kahiwatan ang magatapos buwas nga adlaw, Abril 6.
