ILOILO CITY – Hugot nga ginpanginwala sang Presidente sang Market Vendors Association sa Iloilo Terminal Market nga may yara sang nagakatabo nga pagpangilkil sa mga vendor.
Ini matapos nga ginhingadlan ni Iloilo City Mayor Jose Espinosa III sanday Punong Barangay Alain Rey Depatillo sang Rizal Pala-Pala Zone 1 kag Punong Barangay Noel Soliman sang Rizal Pala-Pala Zone 2 nga amo ang nagapangilkil sa mga manugbaligya sa nasambit nga merkado.
Sa interview sang Bombo Radyo kay Dante Mangalisan, iya ginpahayag nga wala sang kamatuoran nga may yara sang ‘extortion activities’ nga nagakatabo.
Mahimo suno kay Mangalisan nga pamulitika lang ang rason ni Mayor Espinosa sa pagpatu-patu sa duha ka mga punong barangay sa syudad sang Iloilo.
Ini bangud nga ang suporta nanday Depatillo kag Soliman ang yara kay Iloilo City Lone District Cong. Jerry Treñas nga mangin kasumpong ni Mayor Espinosa sa May midterm elections.
Sa pagkamatuod suno sa natungdan, bisan siya ang mahimo man nga mapatu-patuan kun mapangitaan sang sala tuhoy sa pagdumala sa mga vendors.
