Nagapati ang presidente sang Samahang Weightlifting ng Pilipinas (SWP) nga dako ang tyansa sang Pinay weightlifter nga si Hidilyn Diaz nga makuha ang gold medal sa 55-kg class competition sa 2020 Tokyo Olympics.
Sa exclusive interview sang Bombo Radyo kay former Bacolod City Representative kag Mayor Monico Puentevella, iya ginpahayag nga makabig nga dako nga balantayan si Diaz bangud una na nga na-angkon sang atleta ang silver medal sa Rio de Janeiro Olympic sang 2016.
Suno kay Puentevella, pat-od nga handa kag pursigido si Diaz nga malapawan pa ang iya rekord kag mapauli ang gold medal sa sini nga tuig.
Makabig man suno sa iya nga beterano na sa weightlifting si Diaz sa diin ika-apat na ini niya nga appearance sa Olympic Summer Games.
Magluwas kay Diaz, gindayaw man ni Puentevella ang tumandok sang Cebu City kag makabig nga promising weightlifter nga si Elreen Ann Ando.
Gin-ako ni Puentevella nga ginapreparar pa niya kuntani si Ando sa 2024 Olympic nga pagahiwaton sa Paris, France apang timprano pa ini nga na-qualify para sa Summer Games bangud sa impresibo sini nga abilidad sa weightlifting.
