Ginpanindugan ni President Volodymyr Zelenskiy sang Ukraine nga handa siya nga maghalin sa iya pwesto kun ini ang magadala sang kalinong sa iya pungsod kag kun ang kabaylo sini amo ang mangin myembro sila sang North Atlantic Treaty Organization ukon NATO.
“If [it guarantees] peace for Ukraine, if you really need me to resign, I am ready. I can exchange it for NATO,” suno sa Ukrainian leader.
Ginpahayag anay ni Zelensky nga kinahanglan gid nga magdoble ang kadamuon sang army sa Ukraine kun indi pa gid sila pagpasudlon sang NATO sa ila nga alyansa.
Sang nagligad nga semana, may mga komento man si US President Donald Trump nga ang Ukraine ang nag-umpisa sang kumplikto batok sa Russia. Sang ulihi, nagsiling naman si Trump nga ang Russia matuod ang nag-atake, apang ginbasol naman sini si former President Joe Biden kag si Zelensky kun ngaa wala dayon nauntat ang gyera.
Nagbalos si Zelensky kag gintawag si Trump nga yara sa “disinformation space”, rason nga nagwangal naman liwat si Trump kag gintawag si Zelensky nga diktador.
Sang nagligad lamang nga gab-i, naghimo ang Russia sang largest single drone attack. Suno sa Ukrainian officials, 267 drones ang ginpalupad sa ila nga pungsod kun sa diin isa ang napatay. Ginhimo ini antes ang ikatlo nga tuig sang anibersaryo sang Russia-Ukraine war.
