ILOILO CITY – Gin-athag ni Presidential Assistant for the Visayas Jane Javellana nga ang eroplano nga ginapanag-iyahan ni Jojo Ang ang ginkasugtan nga sakyan sang duha ka medical technologists kag apat ka support staff nga magapaidalom sa training sa Research Institute for Tropical Medicine sa Metro Manila.
Sa interview sang Bombo Radyo kay Javellana, iya ginpahayag nga antes pa man naglakat ang mga medical personnel sang Marso 22, naplastar na nga daan sa pagsinapol sang concerned agencies kun ano ang mangin plastada sang training.
Suno kay Javellana, kun may problema, may yara man sang nakahanda nga Plan B agud nga madayon ang training kag pasulabihon ang duha ka medical technologist nga magpaidalom sa training sa Research Institute for Tropical Medicine samtang sa University of the Philippines-National Institutes of Health naman ang training sang 4 ka support staff.
Ginpahayag ni Javellana nga ang Research Institute for Tropical Medicine lang ang otorisado nga maghatag sang proficiency sa pagpatigayon sang COVID-19 test apang kasubong lamang ang ginatanyag nga training sang University of the Philippines-National Institutes of Health.
Kadungan sini, gin-athag man sang natungdan nga santo sa ginkasugtan, 2:00 sa hapon ang flight sang mga medical personnel padulong sa Metro Manila kag santo sa certification ni Department of Health 6 Director Marlyn Convocar, ang duha ka medical technologist kag 4 ka support staff ang magasakay sa eroplano.
Mahimo suno sa natungdan nga may miscommunication lang nga natabo rason nga nagsalangisag ang tanan kag wala natuman ang plano nga nauna na nga ginkasugtan sa pagsinapol sang concerned agencies.
