Ginbuyayag ni Presidential candidate Senator Ping Lacson nga kakulang sa pondo ang rason ni House Speaker Pantaleon Alvarez sa iya pag-ilis sang ginasuportahan nga kandidato sa pagkapresidente.
Si Alvarez amo ang presidente sang amo nga partido kun sa diin standard-bearer anay si Lacson.
Nahibaluan nga nag-resign si Lacson sa Partido Reporma matapos nga gin-endorso sang partido ang kasugpong sini nga si Presidential Candidate Vice President Leni Robredo.
Suno kay Lacson, indi siya makasarang maghatag sang pondo para sa galastuhon sang mga local candidates sang Partido Reporma para sa pagpangampanya.
Ginbuyagyag man ni Lacson nga nagpangayo ang chief-of-staff ni Alvarez sang P800 million-worth of additional funding halin sa iya agud gamiton kuntani para sa ila nga local candidates.
Nauna naman nga ginpahayag ni Alvarez nga ang manubo nga survey rating ni Lacson ang rason sang ila pagbiya sa kandidatura sang senador.
Sa pihak nga bahin, apisar nga gindula sang Partido Reporma ang ila suporta kay Lacson, nagapabilin naman ang ila nga pag-endorso sa kandidatura sang runningmate sini nga si vice presidential candidate Senate President Vicente Sotto III.
