ILOILO CITY– Ginpanginwala ni Presidential Consultant for Western Visayas Jane Javellana nga siya ang nagapalapta sang fake news tuhoy kay Iloilo Lone City District Rep. Jam Jam Baronda.
Ini ang may kaangtanan sa isyu nga duha lang ka medical technologist ang natigayon nga nakasakay sa eroplano agud kun tani magpaidalom sa training sa Research Institute For Tropical Medicine bangud may staff sang isa ka pulitiko nga nagsakay.
Sa interview sang Bombo Radyo kay Javellana, iya ginpahayag nga wala sang kamatuoran nga siya ang nagpalapta sang sala nga impormayson batok kay Baronda.
Suno kay Javellana, naglibog lang ang iya ulo bangud sa listahan, may yara sang duha ka medical tehnologist kag apat ka support staff apang pag-abot sa airport, nag-istoryahanay sila ni Iloilo 1st District Rep. Janette Garin nga duha lang ang yara sa manifesto.
Ginpahayag ni Javellana nga mahimo nga may yara lang sang miscommunication rason nga nagsalangisag ang tanan.
Nahibaluan nga ang eroplano nga ginsakyan sang mga medical technologist nga maga-training sa Research Institute For Tropical Medicine amo man ang ginsakyan ni Garin halin sa Manila.
