Ginpatpat sang isa sa mga botante sa Estados Unidos ang importansya sang US Presidential Elections kag ang mga pamaagi sa adlaw mismo sang pagbinotohay.
Sa interview sang Bombo Radyo kay Bombo Rufino ‘Pinoy’ Gonzales, Bombo International Correspondent in USA, iya ginpahayag nga pagsulod sa precinct, pangitaon sang botante ang iya pangalan kag pagahatagan ini sang permit agud nga makaboto sa sulod sang isa ka cubicle.
Suno kay Gonzales, tuman ka importante ang pito ka mga swing states sa eleksyon sa US bangud posible ini ang magatumod sa masunod nga mangin presidente.
Ini amo ang Arizona, Georgia, Michigan, Nevada, North Carolina, Pennsylvania kag Wisconsin.
Gin-engganyo man sang natungdan ang mga botante sang America nga lantawon ang ikasarang kag ang plano sang mga presidentiables sa patag sang ekonomiya, immigration, kag security.
Ginlaragway man sini nga ‘ginakulbaan’ na subong sang kadam-an ang mangin resulta sang eleksyon.
Nahibaluan nga magabunggu-anay sa eleksyon sanday former President Donald Trump nga tiglawas sang Republican Party kag si Vice President Kamala Harris nga nagatiglawas naman sang Democratic Party.
