ILOILO CITY – Padayon ang electoral protest ni incoming Presidential Political Adviser Francis Tolentino batok kay Sen. Leila de Lima apisar nga miyembro na ini sang Duterte cabinet.
Apang sa interview sang Bomno Radyo Iloilo, ginpahayag ni Tolentino nga ila tun-an ang mangin implikasyon sang electoral protest sa iya appointment.
Natalana nga magpakigsapol ang anay MMDA chairman sa iya mga abogado buwas agud hibaluon ang epekto sa iya appointment sang pending nga electoral protest.
Nahibaluan nga ika-13 si Tolentino sa senatorial race samtang ika-12 naman si De Lima sa 1.3 million nga abanse nga boto.
Samtang ginpahayag ni Tolentino nga may announcement si Presidente Rodrigo Duterte sa State of the Nation Address (SONA) sini, may kaangtanan sa ginaduso sini nga pagpaiway sang barangay kag SK election.
Ginahanda naman ni Tolentino ang kaugalingon sa madamo nga trabaho bilang Presidential Political Adviser pero ginpahayag nga indi kaangay ka-stressful ang bag-o nga trabaho kun ikumpara sa pagka-MMDA chairman.