ILOILO – Nagakanugon kag nagakahangawa sa iya seguridad ang isa ka anay preso nga nahatagan sang Good Conduct Time Allowance matapos ang pahayag ni Presidente Rodrigo Duterte nga kabigon nga fugitive ang mga mapaslawan nga magsungka sa sulod sang 15 ka adlaw nga plaso.
Sa exclusive interview sang Bombo Radyo kay Roldan Cambronero, isa ka anay preso sa Iwahig Prison and Penal Farm sa Palawan, iya ginpahayag nga 27 ka tuig siya nga napreso bag-o nahatagan sang Good Conduct Time Allowance.
Suno kay Cambronero, sang Hunyo 2019 lang siya nakaguwa sa presuhan kag sa maabot nga Disyembre 25 kun tani ang iya labing una nga Christmas Day kaupod sang iya pamilya.
Sa pagkamatuod suno kay Cambronero, isa siya sa hand tractor operator sa Iwahig Prison and Penal Farm kag nagabulig man sa iban pa nga trabaho sa sulod sang jail facility.
Ginpahayag ni Cambronero nga sang iya nahibalu-an ang nangin mandu ni Presidente Duterte, wala siya nagduha-duha nga magsungka kag magparehistro sa otoridad bangud nga wala man siya sang may ginabuhat nga malain.
Ang iya lang nga ginakahangaw-an suno sa natungdan amo ang P1 million nga bounty nga gintanyag ni Presidente Duterte batok sa mga ginakabig nga fugitive.
Sa Setyembre 12 suno sa natungdan, igapatawag sang Iloilo Police Provincial Office ang tanan nga preso nga nahatagan sang Good Conduct Time Allowance agud nga ipahibalo kun ano ang ila nga madangatan.
Tuhoy naman sa ginapahayag kontrobersiya sa Bureau of Corrections, ginpahayag ni Cambronero nga indi man mahinago nga may yara sang kurapsyon sa mga ahensya sang gobyerno apang ang paghatag sa iya sang Good Conduct Time Allowance ang iya nga ginpangabudlayan sa sulod sang presuhan.
Si Cambronero ang ginpamatbatan sang reclusion perpetua bangud sa kaso nga robbery in band with homicide and frustrated homicide.
